圓山台灣料理 (已結業)

本身我一年去幾次台灣，最鍾意就係去台灣食嘢，由夜市小吃、熱炒、甜點、到飲料等等都無一不歡。疫情關係，我已經一年冇去過台灣。無論係台灣嘅風土人情、優美風景、美味食物我都掛念得很。正值爸爸生日，我決定公器私用，請爸爸去食一餐台灣菜，順便安撫下自己嘅思念。打開餐牌，我已經眉頭一皺，點解食物嘅內容有超過一半係川菜同廣東菜呢？算數，都已成定局，就揀一啲台灣菜嚟叫。首先嚟嘅係一個小食，我哋食完都唔肯定個材料係啲乜嘢，中間應該係有鹹蛋黃做材料，但係側邊白色位置我哋食完哂都唔知道究竟係魷魚定係蛋白定係其他嘢。跟住嚟嘅係三杯雞，個煲拎到過嚟嗰陣時係好香嘅，但係裏面嘅雞肉其實好少，味道亦都冇乜特別。跟住仲有叫咗個炒A菜，算係吵得唔錯，好似鮮綠唔會炒過龍，但係都係冇乜特別。因為爸爸鍾意食炸大腸，所以雖然唔係台灣菜，我哋都叫咗。大腸切得好細片，得廿片左右，爸爸讚賞佢好多舊都有將腸裏面嘅肥肉都整走，但係我就食得好辛苦，我唔知因為咩原因我覺得呢碟大腸好臭，我喺其他地方食炸大腸都冇呢一陣臭味，我成日形住佢整得唔乾淨，所以都唔係好食得落。