亞金南洋茶室 (黃大仙中心南館)

營業中

休息中

到下午茶時間肚仔餓，喺商場行行吓見到呢間阿金南洋茶室，見到餐牌都好多選擇，所以就二話不說入咗去坐低。云云接近20款下午茶餐裏面有好多款都好想試，但既然第一次嚟到就揀佢嘅招牌茶餐，同埋試埋佢嘅招牌白咖啡。招牌阿甘無骨海南雞配油飯，估唔到以下午茶餐嘅份量來講海南雞都算幾多，冇骨嘅海南雞真係食得好方便，肉質都幾滑，配上三色醬感覺正宗，油飯都好夠味，有香茅嘅香味，附送一碗好濃味嘅冬瓜湯。而朋友就試咗香茅豬扒配迷你地道喇沙，豬扒好入味好香，唔會好乾好柴呢樣抵讚，呢碗喇沙唔算好特別，但係都唔差，有好濃郁嘅椰子湯味，亦都唔係太辣，差唔多飲晒成碗湯，餐廳好細心可以比客人揀要滲滲，又或者係淨米粉或淨米線，自由度大。至於招牌白咖啡係煉奶底，略嫌有點濃，但係仍然十分香，食完主食再飲埋杯咖啡，慢慢享受下午茶嘅時間。