雲長小龍坎老火鍋 (已結業)

曾經係國內食過小龍坎,味道服務各樣都唔錯,唔知香港呢間係唔係同國內屬於同一個集團,見到佢午市有一人一鍋就去試下。佢嘅位置位於酒店入面,熟悉尖沙咀嘅就唔難搵。君怡酒店本身都比較多內地人住,我中午1點入到去有幾枱客喺度,大部分都係講普通話,而侍應第一句同我講嘅都係普通話。 不過呢度人手真係好不足,雖然客人唔多,但係我都企咗幾分鐘先侍應出黎帶位。呢度Lunch做緊一人一鍋,$68-88好抵,有四種湯底可以揀,當然呢個價錢唔好想像食材會有幾高級,而我都係打算嚟試佢嘅麻辣湯底 牛肉偏肥,冇乜牛味。水餃&蝦丸(自選款式各一粒),蝦丸係手打既,好味,水餃亦新鮮。其他既定配料包括有粟米,午餐肉,豆腐,枝竹,冬菇,蘿蔔,蟹柳,娃娃菜。所有食物都正正常常,而且仲可以揀一款麵食,份量十足。麻辣湯底做得幾好,唔夠香但係夠麻夠辣。午餐仲包括一罐飲品(各款汽水/加多寶),好抵。美中不足嘅係呢度嘅服務,人手唔夠,亦無乜服務可言,畀錢嘅時候佢仲找咗20蚊散紙畀我,其實我本身唔介意,不過侍應一句唔好意思都冇,我就覺得呢啲態度唔應該係酒店出現。