日喜樓 (已結業)

以前日熹樓喺灣仔既時候都幫襯過搬左去燈籠街V point更加方便就腳喺地面走過電梯就到，同前店唔同係呢度比較光猛，以前裝修古典，現在帶時代感。睇緊menu，店長就介紹北京填鴨做緊推廣價$159 半隻。有淨皮及皮肉相連，鴨香皮脆肉質香嫩。將連皮胸肉加京葱花、青瓜絲及甜麵醬汁用薄薄既麽麽皮包着，層次豐富又減低油膩感。每張麽麽皮有一層牛油紙隔開，唔會痴住一團～大大隻黃金蝦球一碟4件，新鮮大蝦爽口彈牙，外層炸漿香脆薄身，沾滿邪惡的咸蛋黃卻沒有油膩感覺，反之咸香惹味。爆汁牛肉餡餅，唔好睇佢細細個，入面充滿肉汁，咬開餅皮一時忘記會爆汁，熱辣辣既肉汁流埋出黎～主食想清淡點。。鱈魚雪裏紅煨麵是一個不錯的選擇，先呷一口奶白的魚湯，香滑鮮味湯濃。既有金華火腿添鮮，亦有雪裏紅的爽嫩。幼細的麵條軟而不爛，充分吸收魚湯的鮮味。最正係鱈魚肉都唔少，加埋湯麵一齊食，一腹大滿足!食京菜，甜點少不了高力豆沙～沾滿砂塘既蛋白球入口柔軟有彈性，中間紅豆餡唔多亦唔太甜，而入面既香蕉更增添多一份香氣。另外晶瑩透亮既桂花糕，除左桂花仲有一粒粒蘆薈，口感更加清甜滋潤。