Le Salon Restaurant et Croissanterie (已結業)

小妹今日約左朋友及細妹high-tea，由於無得訂位，只好早到排隊羅位。聞到隔離香氣撲鼻、聞名已久的牛⻆包味道($23)，忍唔住就買左個焦糖味牛⻆包食住等。牛角包鬆化香脆，一咬，脆片四散。外層舖著脆卜卜、甜絲絲的焦糖，內層塞滿香滑惹味的焦糖醬，太過甜和漏了﹗此外，小妹覺得它的層次不夠豐富，內層亦未夠酥化，未算係絕佳之作。 三點啦，下午茶開始，叫左兩份tea set。上層有口感幼滑的朱古力蛋糕、酥皮略嫌偏淋的吉士Fruit Tarts，以及自家製黑白朱古力粒。白朱古力內有脆榛子果仁，較有嚼口。中層的迷你栗子味牛⻆酥味道香濃自然，配合脆口而不膩的酥皮，超好味；金黃色的提子鬆餅，牛油味香，外脆內軟，再搽上果醬及忌廉，味道簡直天衣無縫﹗下層係鹹香惹味的巴約納火腿三文治；甘香魚脂味的煙三文魚三文治；以及鹹中帶甜、甘香又滑溜的鵝肝焦糖燉蛋，惜獨欠一片脆口多士以解鵝肝之油膩感。