盛八日式燒肉店 (已結業)

陪完契妹去吉蒂屋朝聖，其男朋友仔為答謝小肥契哥 ，專登翌日請食燒肉放題，地點為「盛八日式燒肉店」。餐廳位於中環夜市旺區內一幢大廈o既三樓，方便又易搵。正門貼有店子營業時間、負款限制等資訊。候座處旁o既牆邊貼有軟尺，清楚列出小童價格以高度計算，高大o既小童按成人收費；唔知唔多夠高o既成人又可唔可以按矮小o既小童收費呢 ？！真係搞笑，接待處有個疑似女版車軚人o既公仔擺設，莫非係用黎警惕女食客小心食完放題會變形 ？！我地一早訂咗位，被安排入座高人一等o既獨立式卡位，絨櫈舒適又寬闊。旁邊o既散座都隔得好開，私人空間都好足。估計人多一齊燒野食時會幾煙吓，天花有把大風扇，應該都係用黎加強抽氣之用。餐店晚市只做放題，每位食客只可逗留兩小時，現包送半隻龍蝦 ，其他餐牌上o既食物同飲品則無限追加。點選食物必需白紙黑字於表格內填寫枱號、人數、菜式編號及數量。餐具旁已準備好三款醬汁供食客自行為燒物加以調味，其中小肥只係用上左邊o既燒烤汁同中間o既檸檬汁。燒肉放題包有汽水及雞尾酒品，即叫即沖，故亦需時沖製，小弟建議容易口乾o既朋友唔好等到隻杯吉空先叫第二杯飲品。小肥第一杯先飲酒味唔太濃o既「巨峰汽酒」