泰.越.港 (已結業)

今日去左中上環玩左大半日，夜晚有啲攰又好肚餓，上openrice見到呢間平平地嘅泰菜就決定去試下。佢係個斜巷中間，都容易搵到。睇左下餐牌都有唔同嘅選擇，一人餐，二人餐等等都有。因為好肚餓嘅關係，我哋叫左二人餐再散叫左啲野，主食要左泰式豬脾同副食要左青咖喱雞。個餐就有跟餐湯同兩個飯，可以加小小錢轉油飯，我哋兩個都轉左油飯。呢個套餐好抵食，個餐湯係平時泰國餐廳嘅湯嚟，同油飯一樣大大碗。而主食同副食都好大份，熱辣辣上枱，豬脾好多肉食，啲皮亦都唔會太厚，而個咖喱就唔會好辣，亦都好足料，好多雞之餘，配料都好多。另外我地加左一個蒜蓉炒芥蘭，炸蝦餅同鳳爪小食。碟菜好大碟下，食落好有大排檔嘅感覺，大份又好食。而兩個小食都好唔錯，蝦餅新鮮，鳳爪夠入味。最後我哋加左杯泰式凍檸茶，個茶底係同平時嘅有唔同，幾特別。呢度仲唔收加一，我哋食咁多野都唔駛300蚊，好正！大家有機會可以試吓架！