影片
更多
2019-04-16
8590 瀏覽
今次我好認真打呢篇食評，因為呢間係全港最出名同最高級既壽司店之一，亦有唔少人對香港Sushi Saito呢間餐廳有種迷思，包括好唔好食？點樣book位？難唔難book位？值唔值去食？等等既問題。所以我都詳細啲打下我個人既睇法同體驗。香港人喜歡日本菜既程度大概不需我多說，我們身邊都一定有唔少朋友一年飛日本幾次，然後分享美食上社交媒體打卡，但又真心講，日本最top既餐廳從來都係好難訂位，有啲甚至要等上半年以至一年，而且好多出名既餐廳都係日本人先能夠訂位。所以日本著名既米芝蓮三星店 Sukiyabashi Jiro或者Sushi Saito 其實好多香港人都未食過。但對於一部分人嚟講，有時候又唔一定要食最好既餐廳既，唔少人就算去到日本都係食平價壽司店例如美登利，或者去豐洲市場食新鮮刺身同壽司其實已經好滿足。不過無論大家食過好野定係想食好野都好，都喜歡睇其他人既食評去斷定一間餐廳食唔食得過，所以我就中肯客觀咁講多啲基本既information出嚟，再分享我喺香港米芝蓮兩星呢間Sushi Saito用餐既experience。<餐廳背景>Sushi Saito 總店喺日本，日本店
<餐廳背景>
Sushi Saito 總店喺日本，日本店2007年獲得米芝蓮一星，2008年榮獲米芝蓮二星，2009年就榮獲米芝蓮最高級別既三星殊榮。
Sushi Saito 於2018年喺香港中環四季酒店45樓開設全球第一間海外分店，Saito San既徒弟嚟到香港主理，並榮獲米芝蓮二星殊榮。
<訂座>
想喺香港Sushi Saito食，有三個方法。
一) 你係四季酒店或者引入Sushi Saito嚟香港既Global Link飲食集團既VIP.。
二) 你有Global Link VIP 朋友refer你/幫你訂位去食。
三) 每個月既一號10am-2pm打去Sushi Saito訂位熱線book位。
我之前試過打電話訂位，但打左半日都無人聽，所以放棄左打電話。最後搵一個係Global Link既VIP朋友幫我訂位所以先有得食，哈哈。
<Menu及價錢>
我覺得一篇好既食評係要有menu比到大家睇下餐廳食咩，不過呢間始終係高級既壽司店，去之前基本上客人都已經知道食omakase，所以去到餐廳內係無一個menu影到比大家睇，但價錢就如下，比大家參考。當中我係食lunch，包括兩款前菜，十件壽司，湯，甜品。
Lunch omakase: $1580 + 10%/per person
Dinner omakase: $3280+10%/per person
<衣著>
我覺得客人衣著方面smart casual嚟到食都足夠，就算唔係都記得千萬唔好著無袖衫，短褲同埋拖鞋嚟，要學懂尊重場合。女士方面就記得唔好噴太多香水，因為香水既味道會影響自己同其他客人欣賞同品嚐壽司既體驗。
<餐廳裝潢>
雖然香港店位於五星級酒店內，但四季酒店將45樓一部分隔開並裝修至跟高級壽司店無異，店內採用左日本長野檜木，沉實典雅。食材每日從日本直送，並由sushi chef喺當地市場挑選。引入Sushi Saito嚟香港既Global Link飲食集團從日本奈良挑選日本陶藝大師辻村史朗以及佢兒子辻村塊既陶藝品，除左作為擺設用途亦承載美食，令客人飲茶或者享用清酒時，令客人感受到融合藝術同美食既奧妙。
<服務>
Service on point. 經理同侍應都有禮貌，除左遞上熱毛巾同埋熱茶之外，仲會不斷幫你更換熱茶。
<用餐經驗>
<師傅手勢和刀工>
日本菜最重要除左新鮮既食材之外，最重要都係壽司師傅既手勢同刀工。個人認為以香港嚟講Sushi Saito 壽司師傅既刀工不錯，而且非常專注。而手勢方面呢，師傅有時會同客人交談，看似好悠閒咁，但其實熟能生巧，手握壽司飯力度剛好，亦唔會話太鬆散。
前菜
Komochi yari-ika
前菜總共有兩道，分別係兩道熟食既菜式。第一道就係Komochi yari-ika (子持ちヤリイカ) Pregnant Spear Squid with roes. 即係魷魚同埋佢既卵子，質感幾爽口。
Kama-toro
第二道前菜係Kama-toro，即係吞拿魚既鄂位，嚐到油香之外，質感非常軟腍。<壽司>
其實而家食壽司就算喺日本都已經唔少地方都唔會由白身魚食到紅身魚(即係淡味食到濃味)咁，所以師傅點安排我就照食啦。
Kinmedai 金目鯛
有部分既壽司店會用火槍輕輕火灸金目鯛，目的為左迫出油份，但呢度無，不過唔係話無就代表唔好，魚既肉質依然夠爽彈。Kohada 小肌
如果你唔認識Kohada 小肌，大概你對壽司既認知都係比較少。Kohada 小肌係江戶前壽司不能或缺既一員，呢間肉質幾好之外，醃得唔錯，酸度亦平衡。Akami 赤身
吞拿魚赤身，經過醬油漬，唔會太鹹亦嚐到魚既味道。Chu-toro 中拖羅
呢件中拖羅當日喺魚既鮮味同油脂甘香程度當中都算平衡。O-toro 大拖羅
我好期待既大拖羅，唔算入口即融，但食落都嚐到油脂甘香。Sumi-ika 墨烏賊
Sumi-ika 墨烏賊都算唔錯，質感幾爽口。Aji 池魚
當日既Aji 池魚好食，蔥我覺得係神來之筆，香味突出但亦唔會蓋過魚既鮮味，亦嚐到油香。香港嚟講算係我食過人生當中最好既一件池魚。Sea Urchin海膽
海膽用上北海道馬糞海膽，當日既質素好新鮮，海膽甘潤鮮甜。Anago 海鰻
其實質感幾fluffy，呢間主要用鹽去調味，不過我更喜歡令一間加上甜既醬汁既海鰻。Clam 大蜆
蜆肉質清爽，醬汁稍為過甜。
卷物
卷物包括青瓜，海膽，蟹柳等。質感爽口但食完即忘記，所以普通啦無咩特別。Tamago 玉子
呢件玉子好食！平滑得嚟，拎起就發現質感好Q彈，蛋味亦都好香甜。麵豉湯
真心講，好普通，同其他日式壽司店飲到既麵豉湯分別不大。甜品
甜品以蜜瓜作結，坦白講呢件唔係我食過最好既蜜瓜，但基本上都算幾鮮甜多汁。<價錢>
Lunch omakase: $1580 + 10%/per person
Dinner omakase: $3280+10%/per person
<總結>
呢篇食評我好用心機打，因為好多人都對Sushi Saito有迷思，所以我就將我最真摯既感受打出嚟，畢竟食完都使左一大筆錢。Sushi Saito既價錢我真心覺得係貴，但質素以香港既omakase嚟講又真係算係頭5位最好。當然，心目中有壽司店既質素差唔多但價錢平一半，哈哈。所以我認為如果你願意使錢喺食物方面既，Sushi Saito一試無妨既，如果你真係覺得貴既咁或者儲下錢去日本食好過，哈哈。
張貼
