薈萃閣 (已搬遷) 新店位置

一家五口大年初一去完西環拜年，之後諗住喺附近搵間酒樓食飯，不過當然係fully booked啦，於是媽媽就建議不如食buffet，估計新年應該唔多人揀西餐既，如是拿拿淋打黎book枱，又真係仲有位喎！7點黎到，都差唔多爆場，呢度放左好多新春佈置添加氣氛，而更有心思嘅係，佢哋特別加入左好多中式菜式迎合新春主題，好似坐低無耐就會奉上每位一客迷你佛跳牆同一客迷你盆菜，迷你佛跳牆好足料，有花膠又有鮑魚，而迷你盆菜有蝦有鵝掌，令到成餐都好中式好地道。另外有幾道美食，侍應會逐一去每枱落order，然後一一奉上枱，都係任食嘅，包括炸蟹鉗、蘿蔔糕炒蟹、臘味糯米飯同豉蒜粉絲蒸帶子，唔知係咪前面嘅食客叫得太狠，黎到我地果枱已經無晒炸蟹鉗，於是就幫我地轉做炸蠔~個炸蠔就認真中伏，非常麻麻，炸粉好厚，不吃也罷~其他值得食嘅我會話係乳鴿，好入味、肉質嫩，熱騰騰，食多幾隻回本無難度。甜品方面亦頗有心思，有印上福字嘅macaroon，好搶手下，雪糕係haagen dazs，又有香滑豆腐花，呢個價錢for年初一食大餐，算相當唔錯~