籠太子點心專門店

營業中

休息中

十一放假第二日諗住睇夜場電影之前係屋企附近醫醫肚，行行下就到左呢間籠太子。原本就係俾佢門口果塊無味精湯品吸引既，是日係"蓮藕豬骨湯"。餐廳門面都ok，入面格局都唔算太逼，我地兩個被安排左坐係6人檯既邊邊。點心選擇都幾多，價錢唔貴，仲有得揀2粒咁上燒賣同蝦餃，都幾體貼兩人細食。我地兩個人叫左6餸一湯。首先黎左個湯，好大一碗，可以飲成4-5小碗，湯入面有蓮藕同豬骨，味道較淡，可能因為無味精。雪山叉燒包: 唔好食，皮唔脆，餡又少，我咬左兩啖先食到一舊叉燒，仲要顏色唔係一般叉燒咁既色，唔建議食。翡翠帶子腸: 幾好味，帶子份量多，每舊都有2粒小帶子，仲要彈牙。腸粉皮較厚但勝在夠滑，可以一。黑椒金錢肚: 黑椒味濃同少辣，味道惹味，金錢肚彈牙。灌湯餃: 好一般，皮好淋。鵪鶉蛋燒賣: 不過不失。最後埋單兩個人食左$153都幾平，不過總體黎講野食質素一般，樓面伙記好似唔太夠使，得2,3個人。不過都算中規中矩，附近既街坊可以一試。