吉壽日本料理 (已結業)

朋友推介去吉壽食晚市放题，地點好方便在旺角地鐵e1出口就到，食店面積都好大，啲枱以大卡位形式擺放，坐得好舒服，六人以上嘅朋友聚會都無問題😊我哋攞咗位之後 就睇下有啲乜嘢食，好厚一曡分類點餐紙，每樣都剔咗D來試下，跟住去自助區睇睇，有個好大嘅凍櫃同一個暖櫃放咗好多飲品，冷熱都有得比你揀。另外重有啤酒，日本清酒和梅酒比你哋盡情暢飲。   試下D小食: 章魚燒，餃子，葡撻同炸雞粒重有泰式鳳爪，真係幾好食！好快自選刺身盤上枱喇，原粒帶子，甜蝦好大隻，三文魚，油甘魚厚切大大件，味道非常鮮甜，必食之選。吉列炸壕外趣內軟蠔味濃沃，真係好好味一定要食。榴蓮炸彈外皮煙軔甜度適中同芝士年糕一樣都好味道。另外，天婦羅D脆漿粉炸得好薄又唔會好油。迷你手卷，夀司，一口一件剛剛好。重有燒菠蘿，酸酸甜甜開胃之選。每樣食物都有水凖無令我失望。甜品當然要食啦，自家制嘅糕點堤拉米蘇，福餅，奶凍，馬卡龍細細一件，食多幾款都無問題，最後，食埋一粒朱古力味嘅雪糕糯米糍，真係滿足飽喇。價錢唔貴，食物有質素，侍應服務態度又好，值得同朋友再來食。