木槇料理 (已結業)

我胃口唔太好，本來想散叫，食啲刺身拼盤，飲吓酒，都好滿足啊。但係女友人話要食多啲，又唔想咁煩諗啲乜，就叫二人前啦。QRE 呢邊夜晚比較清淨，咁就啱我，太嘈就影響食慾丫嘛。先嚟杯梅酒飲吓，醒一醒胃先。和風野菜沙律，蔬菜好新鮮架，但係我嫌佢地好少沙律醬汁啫。瞬間燻製三文魚，因為我拍咗片影住啲煙出，所以冇相。三文魚好嫩，好香煙味呀。枝豆女友人叫，暖暖地又有啲鹽喺面，佐酒一流。鹽燒鯖魚，鹽好均勻分布喺鯖魚上面，肉質結實，皮香。鮪魚壽司盛，手卷同軍艦都係鮪魚蓉，壽司就係一塊厚厚嘅鮪魚，都好食架。鐵板厚切牛舌，牛舌好厚好嫩，個汁夠嘢未。大蜆味噌湯，可能食得太多味濃嘅嘢，感覺個湯好清，但都有少甜。海膽沙飯，普普通通啦。杏汁豆腐，好滑好香杏味，抹茶奶凍就冇咁滑但都有抹茶香，睇自己鍾意啦。