本延鍋物

營業中

休息中

開業半年嘅shabu shabu，歐式圓拱門以及雪白清雅嘅用色，反倒似一間咖啡廳。午市只供應三款套餐，較瘦嘅特選牛、油花較豐富嘅日本和牛以及一款豚肉，即使唔食牛嘅客人都唔怕無選擇，湯底只有主打嘅Sukiyaki。今日剛好遇上推廣，選用第一款套餐免費升級做同樣瘦削但口感更嫩嘅和尚頭。套餐計算過一人份量，恰到好處不飽滯，包含物為一碟牛肉、蔬菜拼盤、生雞蛋蘸料、蝦滑、烏冬及伴食用胡麻醬。牛肉有四片，厚度適中，卻比一般火鍋牛肉大片及長身，一片等於坊間兩片份量，肉佔比多、同時夾雜些許油花。牛肉片面積雖大，但電池爐火力夠，加上鍋唔大，好快就滾起有得食；肉有肉味，嫩身又帶瘦肉特有嘅鬆化口感，又不同於本地手切牛嘅咬口，介乎中間，配合甜咸兼具嘅醬油湯，令肉香更明顯突出。蔬菜籃非常豐富，各種綠葉、蘿蔔菇菌加上蟹棒，合乎營養均衡嘅標準👍🏻唔覺唔覺其實都幾飽，一餅烏冬都食唔哂，烏冬略嫌未夠彈牙，下水一分鐘，撈起都偏軟爛，但配胡麻醬真係天作之合，頓時惹味加倍。最尾樓面送上黃豆蕨餅作飯後甜點，煙韌彈牙，淡淡豆香清而不膩，正好為呢餐盛宴作結。