泰海鮮 (已結業)

周末假期中午同老婆加兩個朋友入左屯門三聖食番餐海鮮大餐，識揀一定揀中午時分唔洗同人逼～泰海鮮 位於海鮮街最頭頭果間，非常易搵，中午時間都有營業！今次最想食到瀨尿蝦，因為自己係家好難整到！泰式香茅瀨尿蝦第一次食到，淡淡香茅味，同瀨尿蝦爽甜又幾夾！海鮮湯 用左大量雜魚、蜆肉、蕃茄、薯仔提鮮，最犀利仲有剛剛食過嘅瀨尿蝦熬湯。鮑魚用左豉油皇煮，鮑魚入晒味質地仲非常爽彈。桶蠔用最大路煮法薑蔥蠔煲，再加入黑椒調味，蠔肉脹卜卜，鮮味十足！奄仔蟹 通常都會油鹽焗，可以保留晒所有蟹膏，蟹肉都非常鮮甜！辣酒煮花螺 平時食唔得辣嘅我食唔到，不過朋友們都話唔係太辣，螺肉唔會過硬，食落陣陣酒味！白酒忌廉煮花甲配烏冬fushion 配搭，忌廉味好濃郁，花甲亦非常足料又無沙，大家對呢碟都讚不絕口！