有蒸氣 海鮮石鍋專門店 (已結業)

最近同朋友心血來潮想食海鮮，於是就搵左呢間係尖沙咀嘅蒸氣海鮮餐廳食晚飯。餐廳係樓上鋪，環境都頗大，又有卡位，坐得舒適。因為朋友唔食牛，所以我地叫左個海鮮餐，有足足六款海鮮，價錢$328一位都算係好合理。呢度嘅好處係除左混醬之外幾乎都唔駛自己動手，每款餸都由店員幫我地放入蒸鍋、計時、同分配俾我地，可以好懶之餘亦唔駛擔心食物未熟/太熟。食海鮮前首先有個黑松露蒸蛋，一打開鍋蓋已經有濃濃嘅黑松露味，而蛋又蒸得嫩滑，唔駛任何調味，淨係品嘗黑松露味就夠。沙包蜆 竹串海中蝦蜆肉鮮甜無沙粒，蝦肉夠結實大連鮑魚鮑魚肉質厚身，鮮味十足，另外仲有蟲草花鋪面。日本元貝元貝同樣夠鮮味，加上蒜蓉粉絲鋪面，份外惹味。手剁豬肉丸墨魚丸兩粒丸都十分彈牙，果然係手打先做到嘅效果，而且蒸更加能鎖住肉汁。薑蔥鮮魷魚薑葱通常用來炒，但係今次清蒸同樣夠味，反而仲少了一份油膩，魷魚亦蒸得剛剛好，食落唔會太老。最後每次食蒸氣鍋當然唔少得蒜蓉蒸勝瓜，勝瓜入晒蒜蓉味，再吸收埋之前海鮮遺留落嚟嘅精華，食落特別鮮甜。食到呢度已經好飽，好彩我地一早就擔心會太飽所以無叫粥底，反而試咗佢嘅鮮響螺竹絲雞湯，湯底偏清淡，入面有好多響螺粒粒，都幾足料。