極之好粥麵茶餐廳 (已結業)

去旺角突然想食炒公仔麵，就諗起呢度喇，兩點幾都仲有午餐，可惜係唔包炒公仔麵，所以唯有另外叫喇！我地叫左一碟咖喱三絲炒公仔麵同越式大碗飯午餐。炒公仔麵其實即係星洲炒米，只係將米粉換成炒公仔麵。麵炒得夠乾身，料亦好足，賣相唔錯。不過佢既調味落得幾重，味道偏鹹，岩晒口味重既人。同埋真係好辣，辣到要用白飯黎中和返！另外個越式大碗飯套餐有四樣餸，包括雞翼，春卷，扎肉同豬扒。所有餸都炸到好乾，感覺幾熱氣，而條春卷好明顯係中式唔係越式，不過算啦，味道都ok既。同埋唔知點解碗飯一啲汁都冇，完全係白飯，加上咁乾既餸，個人就覺得麻麻地喇，或者可能要自己落豉油吧！套餐可以免費叫特式飲品，我揀左柚子紅茶，第一次咁既配搭都幾得意！另外呢度既大叔待應會幫你洗埋隻碗，都幾細心！暫時都未食過比呢度好食既炒公仔麵，下次想食都應該會再黎！