馬師傅菜館 (已結業)

平時習慣左逢週末就去食西式brunch，但有時食得多都要轉換一下口味，今個星期就決定轉食中式brunch將雞蛋多士煙肉轉成中式點心。棉花雞份量大而且充滿湯汁，外層腐皮包住魚肚，冬菇及雞肉。腐皮帶豆香而且吸滿雞汁香而唔油膩。同時間內裏既魚肚口感軟綿同樣吸滿湯汁，一咬開就滲出大量湯汁溢出。雞肉香嫩滑溜,冬菇爽彈又多汁唔會乾。燒賣皇燒賣上放上一顆大蝦仁及灑上少少蟹子，入口爽彈鮮香。底下豬肉燒賣同樣口感彈牙,肉質唔會死實實而且帶住肉香。馬拉糕馬拉糕顏色呈焦糖色，內裏帶住蜂巢狀。入口鬆軟濕潤又唔會黐牙。帶蛋香又香甜，最重要係唔會過甜膩。蒜蓉炒西蘭花蒜蓉味濃香，配上炒西蘭花好清新。西蘭花唔會有青澀味，口感爽脆鹹香。