榴蓮王 (已結業)

話說有日放咗工之後經過廟街，食飽飯之後想搵吓甜品。突然俾我哋聞到陣陣嘅榴槤飄香，沿住廟街一路行就發現左呢一間榴槤王，門口仲要有一個寫住榴槤Pizza嘅易拉架，吸引左我哋幫襯呢一間鋪頭。我哋首先點左榴槤Pizza，因為我哋返大陸食過一個令我哋非常難忘嘅榴槤Pizza。今次竟然喺廟街俾我哋發現到，我哋梗係唔會錯過。一嚟到擺喺枱已經聞到超級濃嘅榴槤味，完全係香過大陸嘅榴槤Pizza，仲要個皮係十分之薄，拎起嘅時候仲要有芝士係面頭，一擺入口佢陣超重榴槤味真係好耐都唔會散，重點係極多榴槤蓉超抵食！！！之後就到榴槤心太軟，呢份榴槤心太軟睇落非常之靚，十分之適合女士打卡用。當然食落去都十分之好食，係我哋切開個心太軟嘅時候，裏面有豐富嘅榴槤蓉流晒出嚟，同朱古力嘅味道十分之配合。再加上旁邊嘅榴槤冰，令人想再點多一份！下個月就中秋，應下節，我哋仲試左個貓山王冰皮月餅。入口即溶，好香好重榴槤味！