La Kaffa (已結業)

星期六，瞓到自然醒，就想食個 brunch。落雨天，近近地，就去迎海商場試新嘢。一個人揾食，有呢D自閉位就最正，食得自在。面對迎海內園景，感覺都唔錯。內部環境都企理，平日人少D應該仲休閒。之前有網友介紹呢度有我至愛嘅 egg benedict，一於叫嚟試吓。egg benedict 餐包飲品$49，改叫特色咖啡就原價減$8，有得揀，就揀咗杯夏威夷果仁咖啡。咖啡甜味適中，唔駛加糖，但又唔會太甜。egg benedict 造得唔錯，有驚喜。侍應哥哥特登放返上圖咁樣，蛋面向我，令 presentation 同感覺都好好多。egg benedict 有水準，唔會熟得制，又唔會好似太陽蛋咁就算。暖暖地嘅蛋，加上醬汁，帶點點香草味，但無其他廳成日都過重嘅醋味。抵讚嘅係配菜粟米同茄汁豆都係暖架，唔係一般咁涷冰冰！其實一份餐已經夠食，不過聽網友話egg benedict 唔夠飽，所以落單時叫埋份避風塘魷魚圈。魷魚圈炸得熱辣辣，但“避風塘”個名可能誤導咗我，我本 expect 會辣辣地，點知無咩味。點嘅醬都無咩味。如果配個酸辣醬，應該美味好多！整體嚟講，都係一個可以嘆口咖啡，休養生息嘅好地方。