樂心冰室

營業中

休息中

放假同朋友係銅鑼灣希慎行完街，就係後面條細巷搵左間冰室食下，估唔到有驚喜，叫左個$188平地嘅二人餐加水煮魚再加個甜品好滿足。例湯係淮山豬骨湯，加左小小蕃茄落去煲，飲落味道好夠，見到淮山亦好多，味道好出，係一碗夠火喉既老火湯。油麥菜眼望已經好青綠色，落咗少少蠔油，已經好夠味，而且食落口好爽口，味道新鮮，食材好新鮮。涼瓜炆倉魚，涼瓜係非常有益，但唔係個個頂得順涼瓜個種苦澀，餐廳處理得涼瓜味道好好，連我唔鐘意食好苦既苦瓜都好易入口。而且倉魚蒸得好滑，時間控制得岩岩好，入面夠熟而外面肉質夠柔軟。水煮魚食開小辣既人會覺得都幾辣下，但係都有食哂，因為辣得來幾好食，夠味，而且入面有好多魚食，仲有芽菜等配料，撈到飯同幾開胃。生炒骨都炒得好夠鑊氣，而且食落新鮮同夠脆口，咬落內裡肉亦非常鬆軟。最後食了紅豆蓮子奶凍，奶凍食落好滑溜，紅豆數量亦很多，一餐豐富既飯加美味既甜品感覺很滿足。最後不得不讚既係餐廳服務都非常好，食完主動仲幫我地清理枱面然後再比過兩杯新既水我地。