鮨石 (已結業)

又到左半年一次omakase嘅時候，今次揀咗尖沙咀嘅鮨石。我哋叫左「神石」套餐，無論壽司刺身串燒一應俱全。另外仲有Prestige omakase，不過要早兩日預訂。第一道菜色係車海老，蝦肉彈牙鮮甜。第二道菜係北海道剝皮魚，魚肉加埋魚肝嘅味道超正🥰刺身包括粒貝、銀鱈魚白子同煙燻鰹魚。粒貝嚟自北海道，旁邊係檸檬味海鹽，味道非常夾。白子比想像中好食，口感滑捋捋幾得意，而且加咗柚子有少少甜味。最後係煙燻鰹魚，味道甘香，帶有煙熏香味，非常出色👍🏻鮑魚配肝醬，鮑魚肉質彈牙，旁邊仲有少少四季豆。慢煮鰤魚味道都唔錯，魚味非常濃郁。炸拖羅三文治可以話係今餐最好食嘅菜式，拖羅肉質入口即化，三文治好香脆，呢個配搭冇得彈😍終於到壽司環節！今次食到嘅壽司種類並唔常見，由一開始嘅北海道赤貝、喜之次、秋刀魚、銀鱈魚去到海膽都好有驚喜，尤其係銀鱈魚，估唔到油脂咁豐富，肉質細嫩。其他omakase餐廳嘅甜品不外乎雪糕或者蛋糕，但鮨石嘅甜品都好有心機，日本清酒啫喱配上北海道無花果同香印提子🤩今餐價錢係$1600，我認為物超所值，食物賣相好靚，味道都好出色，最重要係師傅好幽默，食飯嘅過程充滿歡樂🤣