影片
更多
2016-04-29
1344 瀏覽
龍城之友的我, 前兩篇寫開食蛋糕, 即刻想起龍城之寶之一: "豪華餅店".好多人"細細個"就幫趁開的'豪華', 屹立於衙前圍道與福佬村道交界, 一睇啲"咁"嘅店面, 大家都估到係'好嘢'!!今早晨早流流'到此一遊', 因為早陣子同兄弟們講開以前總有一、兩間响大家屋企樓下的舊式麵包餅鋪執吓一間執吓又多間咁快要BYE晒喇~ 講開舊餅, 話說"豪華"點都有少少江湖地位啩~ 所以想買來和大家分享, 請佢哋食早餐, 諗起都開心! 同班'兄弟'相處咁耐, 大家日日一齊食lunch、平時又會不定時輪流買吓零食、買吓手信大家分享都真係幾好感情, 好溫馨呀~ 有時休幾日長假就好掛住大家...寫寫吓又寫多咗~ 豪華。。。早幾年的平日經過, 有時都會排吓隊買吓它的出名酥皮蛋撻食、 有時又會食吓佢個果占菠蘿包、 花卷, 都算是回憶中的好味道. 今早來到, 依舊係眼濶肚窄, 人少少又想買多多, 講明'分享', 當然要買多啲俾人揀吓~ 好, 一於買兩個包, 幾件西餅, 。。。。。。頂~ 晨早流流發惡夢, 惡夢開始了~首先, 我經常強調: 做店員的, 無論賣衫褲/賣金/賣食物/賣魚賣菜/飲食業企堂..
好多人"細細個"就幫趁開的'豪華', 屹立於衙前圍道與福佬村道交界, 一睇啲"咁"嘅店面, 大家都估到係'好嘢'!!
今早晨早流流'到此一遊', 因為早陣子同兄弟們講開以前總有一、兩間响大家屋企樓下的舊式麵包餅鋪執吓一間執吓又多間咁快要BYE晒喇~ 講開舊餅, 話說"豪華"點都有少少江湖地位啩~ 所以想買來和大家分享, 請佢哋食早餐, 諗起都開心! 同班'兄弟'相處咁耐, 大家日日一齊食lunch、平時又會不定時輪流買吓零食、買吓手信大家分享都真係幾好感情, 好溫馨呀~ 有時休幾日長假就好掛住大家...寫寫吓又寫多咗~
豪華。。。早幾年的平日經過, 有時都會排吓隊買吓它的出名酥皮蛋撻食、 有時又會食吓佢個果占菠蘿包、 花卷, 都算是回憶中的好味道. 今早來到, 依舊係眼濶肚窄, 人少少又想買多多, 講明'分享', 當然要買多啲俾人揀吓~ 好, 一於買兩個包, 幾件西餅, [唔該阿姐!]。。。。。。頂~ 晨早流流發惡夢, 惡夢開始了~首先, 我經常強調: [你尊重人/人尊重你!] 做店員的, 無論賣衫褲/賣金/賣食物/賣魚賣菜/飲食業企堂...諸如此類...我都勸勉大家: [人家搵的是辛苦錢, 由朝企到晚, 體諒吓佢哋, 尊重吓人家, 唔好對人白鴿眼, 你好人好]...etc...etc...睇開我食評的各位, 應該都會睇過類似的'互勉之'內容, 我主張以禮相待, 入門好/上車好, 叫聲Hello/早晨, 你好我好大家好! 今日, 一入店已經見到平日嗰兩位'雙寶'阿姐X口X面, 講真, 十次有八/九次都係咁, 我都慣晒, 總之, 妳係咁做人, 唔代表我要被妳影響, 我做番自己, 用對人應有的良好態度對各位, 就是好聲好氣同佢哋講: [早晨! 唔該一個果占菠蘿包 、一個腸仔包...]
今次招呼我的是細細粒阿姐, 照舊一貫的唔好態度"招呼/呼喝"我, 我都慣啦, 我是我, 阿媽教落: [禮多人不怪], 好聲好氣同佢落埋個柯打: [唔該另外我想要一件花卷、一件合桃牛油、 一件提子牛油、一個合桃杯cake、兩件卷蛋、兩件朱古力三角.] 我反正都係諗住買'幾件西餅', 無所謂幾多件, 多有/多買/多食, 每人食多件有咩所謂, 早餐食唔晒咪下午茶食過囉, OK!!
執執吓, 喂~唔對路, 牛油方cake同卷蛋放入去就梗係ok啦, 四平八穩, 但係放完件合桃杯cake就有問題, 已經無咩位剩, 我以為佢有咩'特異功能'放到餘下三件入盒, 但見佢塞完件花卷, 真係無可能塞到兩件朱古力三角, 三角肯定被'移平'啦! 於是我同阿姐講: [滿到咁, 可唔可以要少件?], 佢即刻好差口氣話: [一早講明係八件我至俾呢個盒你!] 我知, 呢個係平時買八個蛋撻個盒, 所以要八件西餅至有呢個盒?! 但個盒咁袖珍咁扁真係無晒位喎, 件朱古力三角點睇都放唔到入去啦...咁另外個大隻阿姐又兇神惡殺, 我真係睇見都想快啲鬆人, 於是說: [勉強冇幸福, 件餅放入去爛硬, 就咁7件啦. 另一件搵袋裝開啦, 自己食啫...] 大佬呀, 其實妳哋係幫老闆賣嘢的售貨員? 定係家族生意妳哋係倒米親戚? 有無人話到俾小妹知咩淵源?
可能我唔係發哥佢哋唔會好態度? 但無街坊無妳哋啦, 互相支持啫! 妳當日陷入"地溝油" 事件, 全靠大家街坊不記前嫌的支持 (為免openrice話無証明不可出post, 所以refer番: https://www.youtube.com/watch?v=5byYZgxtDyI 及 http://www.metrohk.com.hk/index.php?cmd=detail&id=243615 禁強冠油:名單上亦有不少知名食府，包括九龍城豪華餅店等。) 我話晒都是其一支持者, 相信妳店只是一時錯手, 間中仍有幫趁, 妳又用番啲咩態度對待我哋不離不棄的街坊呢? 尤其是我自問從來對妳們都是禮禮貌貌好聲好氣! 我知, 我唔係由學生年代著住校服走嚟幫趁妳, 唔通因為我唔係'熟客'妳唔係睇住我大我就要受吓氣? 但大大話都見過百幾二百次, 妳哋真係唔覺得我都係幾長情? 肯長期'受氣', 係'好客仔'一個?! 搵次好少少得唔得? 唉, 算把啦, 自己"lo-呢-煎"... 抵呀!!!!!!!!
盒嘢一亮相, 兄弟們都'起哄'話個紙盒好正! 真係'受'完都消番氣~
我一早'响'咗: 迫到啲餅可能有少少碎, 大家都話: [無所謂!] 而幸好未有太多損失, 至多是唔好睇啫.
其實阿姐妳有無諗過件餅話晒都要成8蚊, 點解我要俾8蚊買件'解體'餅?!
其實爛餅都唔係第一次, 上次買大卷蛋, 佢又俾一個方型扁餅盒出嚟裝, 即係又係那個裝圓型三文治蛋糕盒, 喂~ 明明個大卷係圓卜卜漲轆轆的, 回去變成扁塌塌, 亦有少少爆開...我明, 成本問題, 舊餅鋪未必有能力去印好多款Size紙盒, 所以一盒多用, 但, 大家諗一諗啦, 俾到$95蚊一條大卷蛋, $8蚊一件西餅仔, 係咪好平? 係咪真係蠅頭小利到妳無多餘成本去出多個盒? 大卷蛋話晒都係妳另一個名物真係唔可以有個高身少少的盒寺載? 定妳慳制作成本袋埋入袋都好合理? 而街坊咩都'將就'你吧! 成日都'老店'前'老店'後, 可能大家都寵壞了一些老店成為了老奉. 講番件餅, 其實點解我條題要起: [OK嘅, 唔食無損失!] 係因為'兒時味道'幾時都有影響大家的情緒加晒分, 當'大個'食番成日覺得'以前好食啲', 唔多唔少係因為人大了, 食多咗好嘢, 食番轉頭會識分質素. 唔係食物本身製作差咗. 好似呢度所謂馳名蛋撻, 其實蛋無蛋味, 酥皮亦普通, 未食過長沙灣'新華'唔知原來水準係咁大分別; 又好似呢件餅, 今日食落去, 只覺幾種蛋糕的味各自唔突出, 朱古力味是假朱古力味, 奶油唔係靚奶油, 食完件餅有少少'浪'住的感覺, 咁少'奶油'都咁膩, 玩過吓烘焙的我不暗又諗喇...[究竟又係咩嚟呢?] 睇番人家食評又睇到去'Supersupergirl 寫的Smelly Margarine'......算~ 唔好諗落去喇...
(俾OK唔俾喊面係因為間中食吓啲包都OK嘅, 至少佢唔係出軟塌塌包或者空心包, 同埋'老店'我想佢好唔係想佢摺, 希望佢仲有反省的一日雖則都幾難~ 唯望兩位黑面阿姐早日搵大錢早日退休妳好我好大家好~)
張貼
