爆丼屋 (已搬遷) 新店位置

已經好耐冇去過爆丼屋，前排見佢哋九龍灣Mega Box嘅分店唔使點排隊，就同朋友去咗試吓，果然質素都仍然唔錯，性價比亦都幾高。我哋分別叫咗三文魚火山丼同埋火焰盛丼。一上枱就見到啲魚生滿到就快瀉，睇落都覺得好滿足。魚生食落都好鮮甜，好有油香，我最愛嘅三文魚子亦都唔會話好細粒，用嚟送飯一流。另外火焰盛丼啲魚生經過火炙後，更加有油香，如果怕食太多魚生會膩嘅話，都可以試吓！另外每個丼飯仲會送埋麵豉湯，食完生冷嘢飲返碗熱湯，會覺得好舒服！