組長日式放題 (已結業)

近排特別多人約食放題，可能因為諗食咩太困難。食得密自然要揀啲低價位放題。今次嘅組長好易去，一出站就係。未新年就開賭？去到先知呢排每兩個人去食就可以搖魚蝦蟹3次，兩粒相同就有獎，但你幾好手氣都好，只可以三份禮物揀一份。最勁嘅銅錢圍骰大派一千現金，promotion period咁長都唔係冇人中架！拎上手粒骰真係冇做假。我頭2次都落空，第三次終於成功，換到支清酒，仲可以拎走添。坐低即刻送火鍋，湯底味道唔錯。我哋仲加咗錢，可以叫極上menu。每一樣都好有水準。我哋每人食咗十幾隻珍寶帶子，三四隻蟹腳。極上menu質素明顯高幾班，所以我覺得加咗錢反而幫到我回本。普通menu嘅話牛肉類比較好食，牛味幾濃又唔會過老。熱食水準比較穩定，唯獨係天婦羅類調味唔夠。要注意嘅係用份計嘅款都比較大碟，要量力而為。最後讚讚呢度嘅服務，上菜快，唔漏單。而且都幾細心，換碟時機啱啱好，有幾次想搬火鍋爐頭/碟侍應都主動幫手。