英皇紅酒扒房 (已結業)

由屋企去鰂魚涌其實都幾近，所以星期六日有時都會係呢度出沒。鰂魚涌一到星期六日就會變得相對靜，少左平時煩囂同埋人來人往既感覺。係呢度搵食相對變得容易，最少唔駛等位咁麻煩。今晚行過見到一間餐廳價錢合理，於是就入左去食晚飯。餐廳主打西餐，內裡都幾寬敞，冇迫既感覺。餐牌既套餐唔會好貴。餐湯餐湯先有羅宋湯配多士。羅宋湯唔會好稀，湯既濃度適中，多士就非常脆口。脆皮德國鹹豬手 $168豬手都幾大件，一個人應該唔會食得晒。就咁睇仲以為豬手皮會硬，原來勁脆口。至於豬手本身好腍，啖啖肉，真係食極都食唔完。豬手上枱既時候店員又會比幾樣醬汁揀，揀番平時最鐘意既黃介末襯豬手。配菜有脆薯角，熱辣辣好好食。美國野生有幾燒春雞 $148燒春雞原隻上都幾大隻，$148晚餐食到價錢合理。燒既火喉唔錯，切開燒春雞，裡面既熟度都係岩岩好，咬落多肉而且尚算嫩口。唯一美中不足係通常食燒春雞都有手套提供，而呢度要用刀叉食。旁邊仲有金黃色既脆薯角，大愛。今晚呢餐兩個人都係三百蚊多d，不過呢兩個餐既份量真係好多，多到食唔晒，飽到食唔落甜品。相信呢個份量三個人食都足夠，而且會變得更加抵食。