Barg (已結業)

琴晚激嬲A姐，所以今日搵間餐廳氹吓佢開心先得！特登搵咗呢間位於銅鑼灣嘅Barg，除咗餐廳有情調，環境座位非常舒服之外，但重點係價錢唔算貴，而且食物有質素，聽講食物好味會令人心情靚啲，咁A姐就唔會嬲我啦！橄欖蒜油餐包一坐低，店員就會奉上礦泉水同餐包，餐包會烘番熱，所以夠香脆軟熟！配餐包唔係用牛油，反而用上蠟燭烘熱住嘅橄欖蒜油，保持溫度同香味。意式白酒煮蜆扁意粉啲蜆好大隻呀！而且份量一啲都唔少，數埋有12隻，蜆肉厚身，漲卜卜非常肥美！扁意粉掛滿汁，帶有淡淡酒味，但又唔會太搶，整體嚟講，非常creamy！烤德國咸豬手豬手預先切開碎上，所以食嘅時候非常方便！豬手皮炸到脆卜卜，至於肉質非常嫩滑甘香，整體嚟講唔會太肥。如果怕膩嘅，可以連埋伴碟嘅酸菜同蘋果蓉一齊食，就更加滋味。