正宗山西刀削麵店 (已結業)

同舊同事喺附近做完yoga,荃灣地膽嘅佢帶我地去食人氣刀削麵。第一次食，滿足同抱住個肚走！一碗麵，大大碗，少少大食嘅我都食唔晒！叫咗碗原味菜肉雲吞併魚蛋刀削麵，原味湯底濃郁，好似飲緊精華湯底感覺。而刀削麵麵質有咬勁、煙靭。有埋一堆葱花，加埋一堆生蒜過嚟更好。配菜首推魚蛋，新鮮炸到皮係金黃色，皮薄薄，入面魚肉唔彈但好爽。咸味夠，好好味！而菜肉雲吞都唔錯，皮算薄，個餡料切到好細好細，感覺細膩唔粗糙。另外叫咗碟人氣小食手撕雞，啲雞撕到大細長短一樣咁滯，做到粗絲嘅效果，加上青瓜絲，配搭會好爽好清新。喜歡佢加埋麻辣料上頂，少少都夠辣，夠重口味。