魚眾不同酸菜魚 (啟德一號) (已結業)

今日約左同事食晏，唔想行太遠，過左嚟啟德一號呢間「魚眾不同酸菜魚」。餐廳環境雅致，裝潢新派，設有落地大玻璃，景觀十分開揚，加上座位又夠闊落，感覺超舒服。店鋪主打酸菜魚，有辣有唔辣，另外仲有一人專享嘅麻婆豆腐、口水雞、花膠雞煲、經典炒飯同一系列煲仔飯等供應。我哋點左個一入份系列嘅唔辣老壇酸菜湯 同 薑蔥田雞煲仔飯。酸菜湯先揀主題，有鱸魚片、生魚片、龍利柳、墨魚片等等，選了鯛魚片 ($78)。每個餐都會跟兩款配菜同一款主食，揀左豆卜、豆腐皮及手打薯粉。湯底因為揀左唔辣，所以味道頗溫和，入口酸酸地、好開胃。鯛魚片白滑鮮爽，入口細嫩鮮美，加上每片都切得好大塊，夠厚度，食完好有滿足感。豆卜索滿了酸菜湯汁，非常惹味！豆腐皮有咬勁，食落爽口彈牙。薯粉水準亦唔錯，份量夠多，晶瑩剔透，質感滑溜，而且嚼勁十足，即使浸湯後也沒有變腍。至於另一客薑蔥田雞煲仔飯 ($76)  亦非常足料，田雞肉質結實，煙韌彈牙，入口挺鮮味，配上飯底嗰層脆而不燶嘅飯焦吃，份外滋味。跟餐飲品同事點左凍咖啡 (+$10)，而我就揀左菠蘿梳打特飲 (+$12)。杯特飲好 fresh，味道唔會過甜，入口充滿菠蘿香，夠晒解渴。