金御海鮮酒家 (已結業)

上星期我個助理開到口想我請食飯，無所謂啦 ~ 就決定今日成 term 六個人一齊飲茶食午飯聯誼吓啦，一餐半餐、大家高興，我請絕對無緊要，大家起筷食多啲，雖然今日我請客，但我唔發板喇 ~ 有咩覺得好味既，就隨便叫黎試吓啦 ~ 我都係第三次黎依度乍 ~ 但試真講句，出品既質數真係好飄忽，時好時壞，係天堂同地獄之分 ........蒜香拍青瓜，真係好好食，每條青瓜真係有拍過，又新鮮爽口又入味，酸酸甜甜好開胃，冷盤又夠凍，好多餐館求其掉堆生蒜蓉係面就算架喇，連撈都懶撈。暫時食過最好食既，係係度 ﹗奶皇流沙包，因我一向都唔太好甜野或飲茶食包。今次係第一次食流沙包，好香蛋味，未算太甜，可以接受，口感滑滑的，又熱辣辣，感覺唔錯，幾好。炸雲吞，唔係錦滷嗰隻，蝦彈牙、雲吞皮炸得脆，汁普通，無特別。蠔汁花生雞腳，都炆得夠耐，雞腳夠膠口軟棉滑溜，一啜就去晒骨，夠晒快感。爉味糯米飯，味道好香，口感嚥靭，其實好好味架，但最失敗係濕嗒嗒呢，唔洗放落口，淨係睇已經見到亮立立，賣相麻麻，顏色程深啡色 ~