鳳城皇宴 (已結業)

每兩個月點都會嚟三聖食一次海鮮，以前例牌係 “ 發 記 ” 買料 “ 棠 記 ”煮，剛巧今次棠記無得訂七點，榕龍又滿咗，唯有試新野：“ 鳳 城 ”！ 太子同尖東就去得多，必食炸子雞同西米布甸 …… 海鮮加工？好似九唔搭八，不過，天生有冒險精神既我，當然唔怕喇 …… 去到發記，口痕叫咗隻三斤龍蝦，加埋其他六七種海鮮，埋單 $3000，合理喇！ 去到鳳城，加工只係 $1300，正常偏低喎！ 如果唔計湯料，只需 $1000，咁就真係好抵、好抵、好抵！平還平，都要好食先得㗎 …… 得！真係好得：蒸帶子、炒蟶子無過火，辣酒花螺湯頭風味十足，豉油王中蝦、上湯龍蝦、椒鹽賴尿蝦、羌沖蠔 …… 全部都高水準！ 差點想同經理講：「唔該，幫我叫大廚出嚟表揚一下！」服務同環境方面亦非常好，經理招呼主動，姐姐細心又勤力，加上態度親切，唔迫、唔嘈、唔會催你埋單。 最後，當然要有蓮蓉西米布甸做甜品喇，大滿足！以後去三聖買完海鮮就直接嚟鳳城，唔使稔喇 ……P.S. 泊唔到商場停車場就去泳池停車場，距離約五分鐘腳程，$8 /30分鐘。