撈得店 (已結業)

A先生收到風，據聞秀茂坪開咗條新食街，於是今個Happy Friday我地決定去掃街試食! 話說Crazy eater二人組，自細喺好多明星都揸車嚟開餐嘅「東大街」同堪稱為西灣河小士林嘅「太安樓」打滾多年，縱慣哂條脷，可以話對街頭小食要求非常高！到底Ｍ.C.BOX寶達市場嘅質素係點？試咗幾檔小食店，買咗餃子、石磨腸粉、糯米雞，全部味道都麻麻，A先生話:「都係投返傳統腸粉一票」，其中糯米雞仲要唔熟.....唯一值得食嘅，只有撈得店嘅香蕉煎餅，總算冇嚟錯！認真，之前喺泰國街邊食過類似香蕉煎餅，估唔到喺呢到都食到！真係好好好好味，煎得好香，唔燶，好脆，而且皮薄香蕉餡又足料，最正嘅攤凍咗好耐食都仲好好味（因為要等埋其他小食店嘅嘢食），襯熱食應該仲正！下次有機會再試埋其他鹹食煎餅，希望將來有機會喺其他地區食到撈得店嘅香蕉煎餅啦：）