滿樂潮州 (東薈城名店倉)

營業中

休息中

平時食得多日本野，刺身、壽司、拉麵等，有時都想轉換下口味，今日入到東涌就試下啲潮州菜帶比味蕾新刺激。餐廳裝修同環境都算舒服，食物又唔差！前菜上左兩碟小食，分別係咸菜同蓮藕。蓮藕有驚喜，有別於一般爽口嘅形象，食落少少似糖冬瓜，令人好深印象。我地先叫左半隻潮州咸雞花生，雞味十足又嫩滑。我自己想食好耐嘅半煎煮馬友魚終於食到啦！平時食到嘅馬友多數都係煎或蒸。今次半煎煮令我有驚喜，一嚟煎過令魚嘅油份滲出，表皮焦脆，令味道豐富。再用湯煮嘅時候保持魚嘅鮮味，配埋麵豉、白菜仔等配菜，好食到停唔到口。食完魚再食道和味橙香排骨，同之前食過嘅香橙骨唔太同，佢地橙味可以用撲鼻而來黎形容。骨頭唔算大，肉嘅比例多，味道酸甜，好開胃。仲叫埋潮州菜唔少得嘅鮮蠔仔泡粥，食到蠔仔嘅鮮味之餘，同時又飽肚嘅感覺。我地更撈埋馬友魚嘅魚汁嚟個crossover，係成功嘅，又提鮮了。最後當然要叫返個甜品收尾。我個人本身愛食紅棗糕，而呢個蓮子棗皇糕食落有啲似馬蹄糕，裏面一粒粒嘅蓮子有咬口，紅棗味道突出，值得一試。