新斗記 (已結業)

原本想叫大糯米雞既，剔咗咗呢個蟲草花蒸雞，五舊斬開咗既雞中翼，即係兩隻半，急凍貨色，除咗夠熱，一無可取。蒸腐皮卷反而有D驚喜，比外面食到既清新爽口，亦係熱辣辣既，值得推介。南乳豬手，都夠熱，得四件，碟底連墊高少少既花生都慳返。娥姐粉果就比較得，熱辣辣既，點心一定要熱先好食架麻。豬膶腸粉，好明顯就係一條開三，比起平日係普通酒樓食果D，變相少咗一條。未放豉油，又係微微暖既，D豬膶好薄，有少少鞋同豬膶既腥味，唔見得好好食。好似煙仔餅咁粗既春卷真係過份得離譜，你地估都估到個餡都應該冇乜料到架啦。至於芋角呢，唉，我係警犬黎架嘛，食得出D炸芋角既油好唔掂咯，有少少萬年油味。而且一D都唔鬆化，又唔熱先係死罪呀! 唔好忘記我地係早上茶市第一批客呀，冇理由係唔熱既。室內裝修光猛，格局高檔，可惜碗筷清潔度強差人意，嚴重扣分，侍應服務久佳，竟然添水後，立即轉身走人兼拋下一句: 自己冚返好個蓋啦。兩個人去，二百五十幾蚊落樓，成百三蚊位既早餐，咁既食物同服務水平，一D都唔抵食。