新巴黎越南餐廳 (已結業)

星期一晚單支去銅鑼灣搵食，突然想起好耐無食新巴黎所以立即行去金百利。一上到5樓行入新巴黎真係嚇我一跳，6點9全場只得一個客! 老闆請我自己揀位隨便坐，我諗咗一陣就揀咗香茅雞翼豬扒撈檬跟金桔檸檬。大約5分鐘就有得食，味道不變， 2隻雞翼炸得好香脆又夠juicy， 香茅豬扒係切碎幾舊而不是完整一塊， 不過實在係生意難做， 食材方面份量難免係要減少啲 ，我都完全明白嘅……唉食物質素味道都保持水準， 晚市收加一， 所以盛惠$67。 我真心覺得價錢實惠， 餐廳環境雖然唔係富麗堂皇但係乾淨企理， 絕對值得各位嘅支持。大約7點半前離開， 銅鑼灣嘅街頭人流感覺上有啲疏落，Sogo對開嘅紅綠燈位唔再企滿等過馬路嘅人， 最多人嘅地方就係地鐵站巴士站小巴站， 好似冇乜人想留喺銅鑼灣嘅感覺，難怪香港嘅餐廳食肆好似要排隊執笠咁，好sad……