江仔記

營業中

休息中

因較早前姨媽介紹話天水圍天瑞商場呢間「江仔記」嘅出品相當唔錯，所以我們都嚟食過兩次，覺得出品都一直保持得幾好，所以今日咁啱喺附近做完嘢之後，就特意搭兩個站輕鐵過嚟食個下午茶！一開始我們每人都叫咗碗魚四味河嚟食，等咗唔駛好耐就有得食喇，首先當時係飲啖湯先，味道係相當清甜香濃，唔會過鹹或過淡，魚蛋嘅質感係非常鮮甜彈牙，而且有濃濃嘅魚肉鮮味，完全唔會有腥嘅味道，而魚皮餃就超級足料大隻，差唔多係其他店兩隻份量，真係超抵食呀！至於河粉其實先係當中嘅主角，因店員話河粉係他們自設工場鮮製，所以河粉嘅質感係極之軟滑薄身，唔會又粗又「嚡」，所以我們決定同之前一樣，都係每人要叫多碗嚟食！第二碗我們就叫咗墨魚丸牛丸河，墨魚丸嘅鮮甜味比魚蛋更加突出，因真係有爽甜嘅墨魚粒，令到口感更加豐富，所以真係超鮮味彈牙喔！另外一樣要重點推介嘅亦都係他們特別秘製嘅辣椒醬，因加咗之後唔會祇係食到辣味，反而更加帶出魚蛋墨魚丸嘅鮮味，令人有種「食上癮」嘅感覺！所以我們每次嚟就算食完第一碗已經覺得飽，但都要叫埋第二碗嚟食先覺得滿意同滿足！