翔壽司

營業中

休息中

自從恢復晚市之後，大家都努力還返啲生日飯債，友人就提議去厚福街搵食，貪呢度多選擇。嚟到大家都表示唔係太肚餓，於是就選擇咗翔壽司食吓壽司刺身。小店規模不大，店內就只有圍住壽司師傅工作枱嘅曲尺形吧枱，大概只有十數個座位，感覺猶如置身喺日本築地嘅壽司小店內。我哋選擇咗精選刺身(二人前)，包括有三文魚、帶子、池魚、甜蝦、油甘魚各兩件，每款都新鮮甘甜。另外揀咗特上壽司盛合，總共有十款不同壽司🍣。海膽鮮甜醇厚，有入口即溶嘅感覺。三文魚籽粒粒晶瑩飽滿，咬落鮮味。牡丹蝦肉質厚實肥美甘甜。帶子味道鮮甜，肉質柔軟。炙燒金線鯛肉質經火炙後更加嫩滑有口感。拖羅雖不算十分肥美，但亦帶鹹香。深海池魚肉質較爽口，試一口足以令人回味。同樣係池魚，上面加咗薑蓉及葱花，香而不辣。特別要讚賞嘅就係呢度嘅服務，員工會首先問客人食唔食Wasabi，我同朋友各有喜好，於是壽司師傅就冇將Wasabi放入壽司內，而係將之放喺碟嘅旁邊，真係非常貼心嘅服務。