影片
更多
2014-03-23
18203 瀏覽
睇住呢間酒店一直動工到落成, 但一路都未試過, 於是趁老公生日, 嚟呢度食buffet慶祝下..............一早book咗枱, 而且係平晚, 所以嚟度時大把位, 而我倆被帶到梳化位坐, 而梳化位雖然只係坐角位, 但都幾舒服, 仲有幾個"cool筍"比你埃住, 唔錯, 而佢呢度d裝修都係以淺啡色 (即係原木色咁上下) 為主, 唔會太暗, 而且望到出面街景, 感覺上都冇咁焗速~ 大部份枱都係梳化, 亦有幾張大圓枱, 一家大細或者二人世界都啱~所有餐具放响枱面上的一個木盒, 當你坐低時, 待應會將個盒蓋打開放斜, 入面有刀、叉、匙羮, 另外, 枱面放埋鉗蟹用具、濕紙巾同餐巾, 一應俱全~ 新環境當然要周圍行下先, 以三百幾蚊的價錢, 都唔會抱太大期望, 都係一般buffet食到的食物, 但仲有唔係太多buffet有的原盅燉湯, 佢呢度設計係一邊一路行為主, 令空間感好大, 你可以一路順住行, 順住拎, 唔駛夾完前面就擰去後面夾, 好似流水式咁, 而且呢度d食客都好守禮, 唔會打尖, 可能仲係新同唔係咁多人, 所以未駛打尖爭食~ 首先當然係食冷盤先啦~ 麵包蟹 -> 老公
一早book咗枱, 而且係平晚, 所以嚟度時大把位, 而我倆被帶到梳化位坐, 而梳化位雖然只係坐角位, 但都幾舒服, 仲有幾個"cool筍"比你埃住, 唔錯, 而佢呢度d裝修都係以淺啡色 (即係原木色咁上下) 為主, 唔會太暗, 而且望到出面街景, 感覺上都冇咁焗速~ 大部份枱都係梳化, 亦有幾張大圓枱, 一家大細或者二人世界都啱~
所有餐具放响枱面上的一個木盒, 當你坐低時, 待應會將個盒蓋打開放斜, 入面有刀、叉、匙羮, 另外, 枱面放埋鉗蟹用具、濕紙巾同餐巾, 一應俱全~ 新環境當然要周圍行下先, 以三百幾蚊的價錢, 都唔會抱太大期望, 都係一般buffet食到的食物, 但仲有唔係太多buffet有的原盅燉湯, 佢呢度設計係一邊一路行為主, 令空間感好大, 你可以一路順住行, 順住拎, 唔駛夾完前面就擰去後面夾, 好似流水式咁, 而且呢度d食客都好守禮, 唔會打尖, 可能仲係新同唔係咁多人, 所以未駛打尖爭食~
首先當然係食冷盤先啦~
麵包蟹 -> 老公竟然夾哂成只番嚟, 真係食蟹都番本, 個蟹超多膏, 蟹蓋入面滿哂膏, 一半橙一半青, 夾埋成寸厚, 但唔會好硬, 食落又有鮮味, 唔會太鹹海水味, 非常滿足翡翠螺 -> 超大只, 真係前所未見, 好好肉, 好爽, 但都係有少少沙
蝦 -> 反而size一般, 不過都好新鮮, 肉質亦好爽
青口 -> 個樣OK, 但唔太好凍食, 所以冇試
刺身 -> 有三文魚 (好肥美)、魷魚 (冇試)、鯛魚 (有筋)、希靈魚 (第一轉ok, 第二轉個味怪怪地)、墨魚 (冇試)、醋青魚 (唔會好醋, ok)食完個冷盤, 當然要歎番盅靚湯先啦~
燉湯 -> 係原盅上, 第一輪係菜乾湯, 第二輪同之後都係老黃瓜湯, 味道超正, 好濃味, 一d都唔似係師傅湯, 係真材實料, 我地當湯係水咁飲, 但佢d料實在太多, 實質飲的湯其實得半盅左右, 但真係好正~原盅燉湯
之後到食主菜~佢呢度有即場燒烤, 見佢有牛有豬有魚有乳鴿之類, 但好似黑忟忟咁, 而且好熱氣, 所以行過就算, 但見個印度廚師會提議你落咩醬, 都幾照顧周到~
隔離就有d印度嘢食, 但款式唔多, 試咗個咖哩 (好香椰味), 飯 (又唔熱又冇乜味, 所以一定要混咖哩食), 薄餅 (好脆, 不過好油)~
行過少少就係即煮pasta, 見佢好大碟, 暫時唔想試住, 不過見隔離枱個auntie都食哂, 所以個味道應該都唔錯~最後再行過少少, 點咗d正嘢食~
脆皮燒肉 -> 睇住佢切時, 個皮真係脆到卜卜聲, d皮碎飛到周圍係
燒西冷 -> 我地食果個位真係啱我地要求, d肉紅得嚟唔會有血水, 師傅切到好薄, 食落好有肉味, 又夠林
燒豬手 -> 唔會太鹹, d肉仲好嫩滑
燒骨 -> 個醬唔錯, d肉都可以, 夠瘦, 但瘦得嚟又唔un
响呢四樣嘢前面有好多醬比你選, 除咗平時見慣的燒汁、英式芥辣、薄荷醬, 仲有三個好吸引我試勻的醬, 分別係薰衣草芥辣 (唔太濃薰衣草味)、黑松露芥辣 (同普通芥辣冇乜分別, 係見到d黑色點點) 同埋朱古力芥辣 (朱古力味蓋過芥辣), 真係醬汁仲多過主菜, 變咗妹仔大過主人婆~ 暫時要中場休息下, 然後再戰其他熱盤~
雖然其他熱盤選擇不多, 而且只係不停refrill, 唔會有新嘢, 嚟嚟去去都係果唔夠十款, 所以我可以試齊哂
~
燒爐魚 -> 已經切開細細件去燒, 但都唔會燒到d散太乾, 仲有少少汁醬燒牛仔骨 -> 味道偏濃偏鹹
羊架 -> 雖然羶羶到, 但d肉好嫩好林, 又唔太肥
瓜環 -> 魚肉釀節瓜甫, 魚肉唔腥又唔散, 瓜環又唔會煮到爛
西蘭花 -> 開頭見到好多黃色茸, 仲以為係蒜茸, 番到去食先見到佢係包住d蛋白粒, 但依然食唔出黃色果d係乜?
黑欖薯角 -> 油咗d
菠蘿炒飯 -> 冇興趣試, 但個樣都好似幾乾身
炒小棠菜 -> 又係好油
煮青口 -> 青口細只左d, 有少少椰味印度食品
食到夠皮, 係時候要食甜品~
甜品種類唔多, 而且大部份都係一般....................
軟雪糕 -> 有杯裝同甜筒任選, 但唔想咁飽, 所以冇試甜筒, 同埋我見佢d甜筒一早就插哂响度, 本人唔太想食, 講番個雪糕, 超正, 好重牛奶味, 你見佢個顏色係黃少少, 冇咁漂白, 而且好夠凍(個杯都係雪住的)糖水 -> 有三款, 試咗紅桑梅 (好似飲緊咳水咁 ), 蜜瓜西米露 (冇乜蜜瓜, 又冇乜西米, 冇乜蜜瓜味, 感覺好水), 仲有個木瓜雪耳冇試
cake/杯 -> 都係得幾款選擇, 我試過的都係好甜
芒果布甸 > 質感唔得, 太林, 又冇芒果味
杞子桂花糕 -> 質感又係唔得, 林到好似溶水咁, 雖然眼見好足料, 好多桂花, 但唔濃桂花香lor~
行過見到佢果部光波機, 就估到佢會有梳乎厘食, 但佢冇牌寫住, 唯有問個師傅, 佢就比咗個牌我, 我問佢等幾耐, 佢就話15分鐘, 到過咗15分鐘, 去問佢, 話未得, 但又唔講幾時得, 咁我又周圍行, 行咗5分鐘再番去, 佢又話未得, 搞到我火都嚟埋, 問佢究竟要等幾耐? 佢突然話得, 叫我比只碟佢, 眼見焗到谷起哂, 急急腳番位食, 但點知.........上面果層就勉強得, 下面仲係好濕, 而且佢個梳乎厘係士多啤梨味, 好似食緊機整棉花糖咁, 入到口溶咗, 仲有d黏牙, 完全失望~
抖咗一陣, 雖然已經好飽, 但依然想搵d菜食下, 就去咗麵檔, 問下可唔可以淨係要菜, 佢話可以, 於是就點咗兩個菜, 但由於我地選的菜要煮耐少少, 所以就比張咭我, 轉頭先出嚟拎~
响等拎菜的期間, 叫定兩杯drink, 佢呢度係包每人一杯飲品, 但你唔問佢就好似唔會主動問你咁, 而我地原本諗住叫檸蜜, 問下佢有冇時, 可能個侍應係新, 但都笑笑口話幫我問問先, 轉頭番嚟時話要加錢, 不過見到後面佢問果個應該係senior少少的女人, 佢竟然係黑口黑面咁, 唔知佢係黑個伙計面定黑我地面, 最後我地都係決定飲檸茶算~等咗五分左右, 出到去原來已經預備好我地碗菜, 等我嚟拎時先加湯~
有機豆苗+娃娃菜 -> 雖然兩樣份量都唔算多, 但D菜都好新鮮, 不過個湯就怪怪地, 好重香料味, 好似係d越式或者泰式果類~實在係飽到行唔郁, 其實呢度仲有其他沙律、生果、巴馬火腿、芝士等果d西人嘢食, 一來我地唔好, 二來真係好鬼飽, 冇位再放.................是次buffet生日餐就此結束, 有機會再同屋企人嚟食過~
題外話/補充資料：
整體嚟講, 以三百幾蚊的buffet嚟講, 真係算唔錯, 食物可接受, 係甜品差咗d, 而且大部份侍應同廚師都笑容滿面, 只有少部份人係冇乜笑容, 甚至黑口黑面, 不過呢d人可以不理~
(以上食評乃用戶個人意見 , 並不代表OpenRice之觀點。)
張貼
