潮州鹵漢大飯店 (已結業)

自己對任食火鍋一向無咩好感，不過呢間潮式任食火鍋改變左我少少睇法，環境同食材都好好。潮州鹵漢大飯店以紅色為主調，無論牆身、傢俬同天花一律紅色。環境都好寬躺，而且好乾淨，完全唔似平時任食火鍋餐廳既環境🤩我地試B餐，由於7點前入座，價錢只係$238。套餐包括手搖海鮮袋同任食火鍋。- 手搖海鮮袋職員等我地打卡之後先幫我地將海鮮同醬汁撈埋。入面海鮮包括鮑魚、龍蝦、帶子、東風螺同蜆、海鮮大部份都高質素，龍蝦肉質就比較鞋，但沾上蒜蓉醬就變得惹味。東風螺同蜆既數量好驚人，食極都仲有🤣。配料仲有萵荀、栗米同金菇。食完海鮮袋就可以打邊爐，湯底有六款，我地㨂左潮仙沙茶鍋，味道唔算太鹹幾適合香港人口味。食物質素對比其他任食火鍋更加出色，估唔到有幾款食材唔駛加錢都係可以任食，包括爽口蝦滑、響鈴、潮州牛肉。所有食材都新鮮乾淨👍🏻套餐可以任食特式小食，其中香芋地瓜球同潮式反沙芋最令人印象深刻。雖然地瓜球唔算熱辣辣，但外脆內軟，味道香甜。另外仲有鹵水五花腩同咖喱牛筋。由海鮮袋、火鍋到特式小食，所有食物都幾好味，自己又坐得舒服，以後朋友gathering話食火鍋，我應該唔會再抗拒🤣