平昌 Premium (已結業)

見openrice訂位有七折menu，就決定試吓啦。一出lift就勁大陣韓燒的煙味，係有少少扣分既，不過staff服務唔錯，帶咗我地去最邊邊位，煙味就無咁勁了。七折menu相對係比較貴既菜式，平均每樣百幾到二百幾咁，有炆牛肋骨、海神湯等等，以為就係得呢個menu，無其他，就叫左呢兩樣同蝦芝士沙律。叫完問佢有無跟飯，staff先拎個有普通拌飯、炒粉絲、韓底炒年糕等等平啲，平均每樣只需幾十蚊既menu畀我。其實果吓係有啲覺得畀人fake咗既。不過兩樣主菜上桌之後就心情好返啲啦，因為兩樣都好大份！炆牛肋骨入味、肉質軟腍，係個汁比較稀，但係性價比其實唔低啵。海神湯好足料，海鮮好巨型，仲有半隻雞，個湯好清好鮮甜，staff仲會幫你剪開海鮮同分湯，服務貼心。不過個湯入面既海鮮唔夠新鮮，蝦夠大隻但唔夠爽。值得一讚既係呢度既配菜可以追加，服務唔錯。但係環境就真係麻麻，張檯有啲油，同埋好大煙，有改善空間哦。