丼吉日式吉列豬排專門店 (新城市廣場一期)

營業中

休息中

同朋友都好懷念一齊喺日本食炸豬扒嘅時光,決定相約喺呢度重拾日本嘅味道由於book咗位,所以兩個人都畀咗卡位我哋 座位好闊落,食飯傾偈好舒服。不過呢度部分卡位嘅設計,同隔離卡位並唔係完全隔開, 私隱度相對就冇咁高。叫咗一客前菜,芝麻醬豆腐,一客二人套餐,吉列豬扒拼豬柳,同埋一客豬肉湯。落單之後,侍應會畀芝麻我哋自己磨,隔咗一陣好快就有嘢食啦。吉列豬柳有四件,cut開分成8件,肉質好鬆化,而且唔肥,炸得好鬆脆至於吉列豬扒肉質就會硬身少少,有四分一嘅脂肪,有啲肥。個人就比較prefer豬柳,肥瘦適中好好味芝麻豆腐好滑,絕對係靚嘅豆腐所製成。豬肉湯我就冇飲啦飲咗麵豉湯,唔會太鹹,裏面有豆腐,海帶同埋少少蜆肉,唔錯既。不過豬扒如果放得耐咗一陣就失色好多,所以一定要趁熱食。順帶一提呢度嘅服務都幾好,由於白飯同埋菜絲係無限添加,店員會經常走埋嚟問你需唔需要加菜,好細心。