雁來居潮州飯店

營業中

休息中

好幾個月冇嚟旺角砵蘭街，諗住去幫襯咗好多年嘅「新泉發」食潮洲嘢，忽然發現舊址變咗間粥鋪，以為執咗唔做﹗失望之餘，離遠見到豉油街口有間新食肆，行過去睇，見到門口企咗個老伯伯伙記，好熟口面，同佢傾咗幾句，先知三個月前「新泉發」原班人馬搬咗嚟呢間「雁來居」﹗差啲走漏眼，即管入去試吓。新店裝修光猛新淨、簡單舒服，廁所乾淨冇味，非常難得，勝過好多餐廳。我哋得兩丁友，點咗滷水鵝片、韮菜豬紅、鹹酸菜魚同潮洲粥，再整支藍妹。鵝片肉嫩入味，韮菜豬紅爽口，醎酸菜好夠味，佐粥一流，食到舊店嘅傳統味道﹗一路食、一路同幾個伙記有傾有講，知道其中一個阿伯由「新泉發」開店做到依家，打工超過三十年，好忠心喎﹗呢啲具風味嘅小店，賣少見少，絕對值得支持，我一定會再嚟，仲會帶多幾個朋友嚟，試多幾味菜。