太陽軒飯店

營業中

休息中

前陣子到佐敦做身體檢查，經過吳松街呢間太陽軒飯店，即時比佢金碧輝煌嘅門面吸引住。停低睇睇，原來係一間潮州滷水專門店，店員向我地介紹，新開張免茶芥加一，即管入去試下先。新開張關係，Menu非常新淨，沒有污漬，感覺良好。食品都有幾多選擇，價錢也合理。先黎嘅係潮汕小食--普寧炸豆腐。佢比一般炸豆腐不同，普寧炸豆腐食嘅時候可先蘸上韭菜鹽水，你可以食到佢外酥內嫩，而且豆香滿溢，有一種相當獨特風味。即係我地平日講嘅煎蠔餅，佢嘅蠔夠肥美，加上粉漿調校得好，蛋香加上鮮蠔嘅香氣，撲鼻而黎。用黎做蠔餅，算大隻架啦。滷水拼盤有鵝片、滷水蛋、紅腸、豬耳等等，鵝片相當入味，超讚呀。烏頭魚份量唔算大隻，但鮮甜美味，特別係個豆瓣醬，調校得相當惹味，烏頭沾豆瓣醬食，簡直係完美配搭。最後當然唔少得蠔仔粥啦，同蠔餅嘅蠔一樣大大隻，又夠鮮甜。落埋胡椒粉，成碗即時香噴噴，越食越想繼續食呀。