荔園茶餐廳 (已結業)

荔園並唔係我嘅童年回憶，佢消失嘅時候我都係得幾歲，所以點解會行入黎，其實都係朋友話個焗豬飯好食。本身以為用得荔園主題就實係好多同機動遊戲有關嘅擺設，所以我連要坐海盗船係食飯嘅心理準備都做埋，冇辦法啦，焗豬喎。好彩，呢間餐廳真係一間餐廳，同荔園有關嘅就係天花板嘅馬，門口隻老虎仔同埋牆上嘅畫。坐低左叫完野大約十幾分鐘碟飯就到左。由於我十分肚餓，求奇影張相就開始食。講個焗豬之前講下個奶茶，整體黎講幾好飲，茶味夠濃，中意茶味濃嘅朋友可以試下。講返個焗豬，面頭芝士唔算多，唔會搶曬風頭；蕃茄如果係切一舊舊會更好，但亦不失新鮮，茄汁味道亦唔會太假；飯底有炒過，值得一讚嘅係蛋量充足，唔係做下樣，但飯身略嫌濕咗少少；豬扒大小同厚度都適中，一食落口就知道有用鎚仔Dup過，口感好好。成個飯嘅份量都幾多，食完都有八、九成飽。加上呢度算幾好坐，雖然冇乜荔園共鳴，但都值得一試。