梨花園韓國料理 (已結業)

我一向中意去梨花園多過梨花苑，之前見佢執左，有啲失望，後來見佢原來搬左，所以今日有機會再去食。我同朋友九點三坐落啲時候，連我哋只係得四、五枱人，我諗係上環啲商業大廈，星期六冇咩人。好彩啲食物依然係唔錯。我哋一行三人叫左個二人餐加雜錦石頭飯，加兩罐OB啤。個二人餐好大，只要加兩碗白飯，三、四個人都夠食。OB啤：係韓國啤，唔太苦，易入口。石頭飯：一定要加個甜辣醬，加左先好味。不過加半碟就夠味啦！二人餐：（七款前菜）豆腐泡菜湯、豬牛雞肉各樣都有一大碟、生菜香葉加麵豉醬前菜OK，唔算惹味，但勝在清清哋，味道唔會太濃。酸蘿蔔絲好味！豆腐湯味道一般，湯料好多，但可能豆腐太多，又冇咩肉，鮮味唔夠。肉類碟碟都嫰滑新鮮，醃得剛好，唔會太重味，冇畀啲醃料味遮晒肉味。中意濃味可點豉油或麵豉醬，用少少香葉同生菜包住食（用一整片菜葉的菜味會遮晒啲肉味），好正宗，好好味，食到肉新鮮肉的原味。服務都OK，佢哋十點幾就LAST ORDER，之後冇幾耐就要埋單，不過我哋食到其他客都走晒，伙記埋嚟執完枱先走，但係佢哋態度都OK。不過，餐枱就抹得唔乾淨，坐落時枱面有兩粒食物碎，有一撻水，椅邊窗台位有個紙巾袋，伙記清潔得唔夠