酒泉日本料理 (已結業)

多年前曾到此餐廳幫襯過，難得今天來到元朗重遊舊地，當然要幫襯下。餐廳環境乾淨食物美味抵食夾大件，一如以往無太大分別。只係身邊男友換成另一人，可說是桃花依舊人面全非。蟹籽沙律(一人前) $26沙律份量十足，一人前夠二人食。粒粒蟹籽勁大篤，青瓜絲夠凍夠乾身爽脆，處理得唔錯。絲絲蟹柳口感軟彈，沙律醬另上自由添加十分貼心，整體非常美味！軟殼蟹反卷 $58壽司大大件絕無欺場，反卷包住軟殼蟹，咬落卜卜脆唔油膩，好好食。金菇鹿兒島豚肉卷燒 $48金菇加豚肉完美配搭係我最愛，豚肉厚度適中捲住大注金菇口感爽爽的好味。連伴碟的炒雜菜都咁好味，好味抵食。浦燒鰻魚(原條) $48配 稻庭烏冬 $20原條鰻魚比想像中細，魚肉不太厚身，肉質軟腍有油份，襯埋鰻魚汁十分美味。豬骨湯底嘅稻庭烏冬湯味濃，紫菜厚身，烏冬煙韌軟彈，整體唔錯，鰻魚加廿蚊有烏冬都抵。