御藏 (已結業)

來北角參加興趣班，由於這晚老公和兒子都不回家吃飯，所以下課後，決定去附近買外賣。本來打算先去國都廣場地下間「山崎」買麵飽做翌日嘅早餐，不過來到時，發現原來旁邊有間西日式外賣專門店，細看門外嘅易拉架，咦、這間不就是上個月才啱啱喺灣仔幫襯過嘅「御藏」？原來北角也有分店，唔怪得裝潢咁熟口熟面，今晚就一於吃便當做晚餐。先細心研究一吓牆身上掛著的餐牌，刺身飯共有 12 款，而熱食嘅飯類，如鹽燒鯖魚飯、豚肉生薑燒飯、蒲燒鰻魚飯等，亦有 14 款，另外亦有日式滑蛋飯、意大利鮮茄飯、日式咖喱飯、蛋包飯、炒飯及精選便當等可供選擇，而且全部飯類都會配麵豉湯、汽水或礦泉水。揀咗個三文魚炒飯 ($70)，一於在店內立食。由於製作需時，所以趁空檔去凍櫃八吓，有壽司、卷物、三文魚刺身、甘蝦刺身、海膽刺身等，全部看起來都十分新鮮。炒飯用一個膠兜盛著，揭開盒蓋，分量非常之多，而且一陣飯香隨即撲鼻而來。舀起一看，飯內夾雜著不少切粒三文魚，另外亦有西蘭花、紅蘿蔔等。飯炒得鑊氣十足，入口乾身不油，而且非常足料，啖啖三文魚，令人吃得滿足。下次等人齊，一於嚟買啲刺身、壽司同屋企人分享。