名人私房菜 (已搬遷) 新店位置

唔係朋友介紹都唔會識上黎，位於漢光大廈，雖然openrice 地址係寫漢口道，但其實大廈入口係響轉彎後既宜昌街，呢點就要留意啦！上到去，門口位是咁的。安排左間房仔，正呀喂，未食已經先感受到家的味道，電視汁撈飯！！上菜啦！先黎菜乾紅羅白豬肺湯補一補，湯渣另上，好耐無飲過啦，本人爸爸以前間唔時都會整架，依家就少左啦。不過要知道洗豬肺呢樣野真係好考耐性架。所以呢個真係心機湯水。再黎薑蔥炒蟹，一上菜望到對蟹鉗真係心心眼，啖啖肉，食落又唔會太咸，正！黃金蝦，好香口，好好味呀！本人好中意食黃金乜乜乜，另外好欣賞個伴碟，成朵花咁，靚靚。蒸海班，蒸得岩岩好，掂呀！涼拌手撕雞，賣相又係好靚，好多顏色咁，見到都胃口大開，食落又係好好味，仲食到有少少wasabi 味，正正子。粉絲蒸扇貝，蒜粒撈埋粉絲已經好好味。魚湯什菌，食到尾聲，有啲菜落下肚，即刻健康啲。最後仲有甜品食，雪梨雪耳南北杏糖水。因為啲雪耳整到好碎，所以食落比較杰身，正呀，好似煮溶左啲雪耳咁！飲完好滋潤。食完超滿足，捧住個肚走。