泰 Thai . Fusion (已結業)

星期日無book位同兩老去食都唔洗排隊，可能位置唔係商場個邊未有咁多人知！？老人家坐底見冷氣吹住換了兩次枱，店員都唔介意幫忙轉位置，態度友善👍🏻餐牌都多選擇，點了生菜包，炭燒豬頸肉，泰式明爐鱸魚，無骨海南雞，泰式雜菜煲。因老人家唔食得太辣，餸菜都點了少酸微辣。生菜包：生菜好新鮮，肉唔會太鹹，味道都惹味唔錯，生菜分量多過肉，包唔哂；炭燒豬頸肉：味道足，肉質唔乾，但炭燒味就欠奉泰式明爐鱸魚：有驚喜，鱸魚肉質嫩又結實，酸辣味無搶左魚本質，因熱住食要食得快d唔係魚背就會過熟；無骨海南雞：肉質保持到滑溜，味道都係唔錯；泰式雜菜煲：烹調得好，煲底無多餘水份，湯汁收哂入菜同粉絲，味道惹味。值得一提，臨走時老人家需去洗手間，店員主動陪同為佢地帶路，又叫小心呀睇住呀，好窩心！總結用餐體驗愉快，味道唔錯，分量正常，四人用餐好飽，價錢合理，環境衛生，店員服務態度好好，泰國菜嚟講我覺得算荃灣區頭五名。推介！