巨一麵堂 (已結業)

最近夜晚放工行過，見到呢間餐廳都幾多人食，所以今日放假決定試下。一入到去餐廳感覺好日本，先有侍應小姐禮貌歡迎，再有BAR檯形式包圍住廚房嘅座位，食客可以清楚見到廚師準備嘢食。呢度落ORDER方法好環保，我都係第一次咁落ORDER。餐牌係透明膠入面，而落ORDER就用白板筆係透明膠上寫，寫錯就自己改，好此細個玩白板咁都幾好玩。哈哈哈哈我自己叫左個特製醬油拉麵同鹽燒牛舌，先講特製醬油拉麵，粒雞蛋大大粒，蛋黃半生熟，碗麵黎到望住啲蛋黃好似要流出黎咁，好開心咖！個叉燒比出面食嘅較厚，大大塊，好滑唔肥膩。侍應小姐介紹話叉燒係日本師傅為配合香港人食法特登厚切，每日新鮮準備，豬肉亦係師傅每日自己親自去市場買。聽到之後立刻望向係廚房裡面切緊嘢嘅師傅微笑左下，真係好佩服佢地份堅持！鹽燒牛舌係呢度嘅招牌菜，一定要試！燒牛舌未放到我面前已經聞到好香，連埋塊干蒜頭食仲香！最驚喜係牛舌又係超厚切，好軟林林，入口即溶。似係師傅於先醃製過，另外每塊牛舌隔左片檸檬，真係好鬼細心，無得頂！呢幾塊牛舌分量都唔細，建議SHARE食。