雄記

營業中

休息中

今日去咗同朋友三個人一齊食一間小店，位置有少少偏僻。店面非常清潔乾淨，座位唔多，得三四張枱。老闆一個人做晒樓面同廚房。首先我哋叫咗兩個湯試吓，第一個，係南瓜湯。南瓜湯非常濃郁，感覺到非常足料。跟住係洋蔥湯，我自己本身麻麻哋飲洋蔥湯，不過試咗一啖都覺得非常之甜，如果鍾意食洋蔥嘅朋友應該會覺得幾正。跟住叫咗兩個牛角包，牛角包係老闆自己整，非常酥脆，好香牛油味，非常推介。然後我哋叫咗一塊牛扒，提提大家，牛扒要預先訂，去餐廳之前同老闆講聲就得，因為老闆話要攞定出嚟解凍，有客人訂先會準備，睇得出老闆對食材準備非常有要求。因為朋友唔係好食得生，我哋叫咗medium，火候啱啱好，牛味非常重。我哋叫咗一個意大利飯同一個意粉。紅酒燴牛肉意大利飯煮得啱啱好，唔會過硬，牛肉煮得好琳同唔好入味，分量亦非常多。明太子海鮮手打意大利麵，意粉係老闆自己整，同現成買嘅意粉口感非常唔同，明太子味道濃郁，蝦亦都好新鮮。最後叫咗一個Tiramisu，本身自己唔太鍾意食甜野，但係都覺得幾好食，質感好棉滑，有香嘅酒味。